ఒక చిన్న మాట :15

మన ప్రధానమంత్రి ''మోడీ '' గారు స్వచ్చంధంగా గ్యాస్ సబ్సిడీని వదులుకోమని చెప్తున్నారు బాగానే ఉంది
ఇది పెద్ద పెద్ద తిమింగలాలను వదిలేసి చిన్న చిన్న ఎరలకై పోరు సాగిస్తున్నట్టుంది . వెనుకనుంచి పెద్ద పెద్ద ఏనుగుల సమూహంలా సొమ్ము తరలిపోవచ్చు కాని మన ముందు చీమలదండు తో పోయే చక్కరకు లెక్కలు కడుతున్నారు . మీది మంచి ఆలోచనే దీని ద్వారా కొంతలో కొంతైనా వృధా కాకుండా ఉంటుంది కాకపొతే మా లెక్క కూడా కాస్త చూడండి సారు . మధ్య తరగతి లో ఉన్న వాళ్ళము , పేదవాళ్ళకేమో సంపాదించేది కొంత ,కాని మా దగ్గర నుంచి ఆ ధరలు ,ఈ పన్నులు అంటూ బ్రతుకు భారము కొండంత . అదే మన ప్రభుత్వపు జీతాన్ని లక్షలలో తీసుకునే వాళ్లకేమో దాదాపుగా అన్నీ తక్కువ ధరలే , మరి కొన్ని చోట్ల అయితే అంతా ఉచితమే . మీరు మంత్రి అయ్యింది కూడా సామాన్యుడి నుంచే కదా ! ఇదిలా ఒక సంపాదన మన మంత్రులకు ఉంటే అది చాలీ చాలదన్నట్టు ప్రజా సేవ పేరుతో వారి తీసుకునే అమ్యామ్యాలు ఎన్నో ... వారు చెయ్యవలసిన పనిని భాద్యతగా చెయ్యకపోగా ప్రతీ ప్రజా అవసరానికి ఒక రేటు పెట్టుకుంటూ ,ఆ సంపాదన ఎందులకు .... అలా సంపాదించి సంపాదించి డబ్బు ఎక్కడ ఎలా దాచుకోవాలో తెలియక ''బినామీలు '' ''స్విస్ ఖాతాలు '' ఎందుకు ....సామన్యుడు నిజాయితీగా నిలబడటానికి ముందు ఉంటాడు మరి ఒక గౌరవ పదవిలో ఉంటూ అందరికీ మార్గ దర్సకంగా ఉండే మన పెద్ద మేధావులే అలా నీతిని మరచి కూడబెట్టుకునే సంపాదన ఎందులకు ... బ్రతికేంత వరకు సంతృప్తిగా నాలుగు వేళ్ళు నోట్లోకి వెళితే చాలదా ? మరి సారూ ? అందరినీ ఒకేలాగా తప్పు పట్టలేం కాని అలా కూడగట్టుకున్న బినామీలను ,స్విస్ ఖాతాలను స్వచ్చందంగా వదులుకోమని చెబుతారా ? వాటిని దేశమో లేక రాష్ట్రమో లేక వారి గ్రామ భవిష్యత్తు కోసమో వినియోగించమని చెబుతారా ?

ఒక చిన్న మాట 14 :

చాలా మంది చిన్న చిన్న వ్యాపారులు ,తమ తమ దుకాణాలు మూసివేసే సమయంలో ,నిమ్మకాయలు ,గుమ్మడికాయలు & కొబ్బరికాయలు ,మిరపకాయలు ఇంకా రక రకాలుగా దిష్టి తీసి , రోడ్డు మీద అడ్డంగా పడేస్తుంటారు .ఇది ఎంత వరకు సమంజసం . అలా దిష్టి వేసి పడవేసిన వాటిని తొక్కితే అది తొక్కిన వారికి చుట్టుకుంటుందని అంటారు . ఇది మన మూడ నమ్మకాలో , మన దినచార్యతో పాటు వస్తున్న ఆచారాలో తెలియదు కాని , షాపులో దుమ్ము ,దూళినైతే ఊడ్చి చెత్తబుట్టలో వేస్తారు . మరి వీటిని మాత్రం రోడ్డు మీద పడేసి పబ్లిక్ ఎందుకు ఆటంకం కలిగిస్తారు . అవి చెత్త లాగా రోడ్డు కి అంటి పెట్టుకుని ఉంటం మాత్రమే కాకుండా వాటిని చూసిన జనాలకు ఒక చిరాకు ,మానసిక అశాంతిని కలుగ చేస్తుంటాయి .

దయచేసి ఆలోచించండి మిత్రులారా , ఇలా దిష్టి పేరుతో మన పరిసరాలను మనమే అశుభ్రపరుచుకుంటే ఎలా ?అందరూ మన లాంటి వారే , మన తోటి వారే మంచి జరగాలని మీకు మాత్రమే కాదు ,అందరి మంచి కోరుకున్నవారే మహాత్ములు అవుతారు . 

ఒక చిన్న మాట 13 :

డా// ఎ .పి. జె అబ్దుల్ కలాం (1931-2015)

ఇది ఒక చిన్న మాట కాదు గుండె బరువెక్కే మాట
గొంతు మూగబోయిన మాట , మాట మౌనంలా నిలచిపోయే మాట
దేశానికే గర్వ కారణమైన మహా మనిషి
ఒక అద్బుత అంతరిక్ష రక్షణ శాస్త్రవేత్త
మన మాజీ రాష్ట్రపతి డా //ఎ .పి. జె . అబ్దుల్ కలాం కన్ను మూసిన క్షణం
యావత్ భారతావని అంధకారంలోకి వెళ్ళిన క్షణం
మనకు ఎన్నో నేర్పారు , ఆయన సూక్తులతో మనల్ని ముందుకు నడిపించారు
నవ్వుతూ పలకరిస్తూ ,తెలిసిన జ్ఞానాన్ని అందరికీ పంచే విజ్ఞాన వేత్త
ఏమిచ్చి నివాళులు అర్పించగలము మీకు
మీరు చేసిన దేశ సేవలకు ,మీరు అందించిన  దేశ కీర్తి ప్రతిష్టలకు
ఊహించని చేదు వార్త ... మా హృదయాలలో చొచ్చుకుని వచ్చిన తూటా
నమ్మలేని నిజము మీరు దూరమయ్యారని
కాంక్షించగలము మరలా మరో అబ్దుల్ కలాం లా మాకోసం తిరిగొస్తారని
.........................RIP

ఒక చిన్న మాట 12 :

నందమూరి తారక రామారావు
ఆ పేరు లోనే అధ్బుతమైన మాయాజాలం ఉందేమో
ఆయనతోటే ఒక గొప్ప దివ్య తేజం ఆవిర్భవించిదేమో
ఆ ముఖ వర్చసులోనే ఏదో తెలియని ఆకర్షణ
ఎంత చూసినా తనివి తీరా చూడాలనిపించే చంద్రబింభం
ఆయన మాటలు వింటుంటే అమాంతం కట్టిపడేసే ఉపదేశం
ఎంత చెప్పినా తక్కువే ఆయన గురించి , ఒకవేళ చెప్పుకున్నా అతిశయమే అవుతుంది
ఆయన నటన ఆయన నైపుణ్యమో , వరమో తెలియదు కాని
ఆయన నటనలో జీవాత్మకత ఉట్టిపడుతుంది
ఆయన ఒక పాత్ర పోషిస్తుంటే ఆ పాత్రకే సరికొత్త రూపాన్ని ఇస్తుంది
అందుకే మనం దేవుళ్ళని చూడకపోయినా రాముడైనా ,క్రిష్ణుడైనా
అచ్చం ఆయన్ని చూస్తే అలానే ఉంటారు అనుకుని ఆరాదించే వాళ్ళు కూడా ఉన్నారు
ఇప్పటి కొత్త తరానికి కూడా ఆయనే ఆదర్శం ,ఒక మార్గ దర్శకత్వం
క్రమశిక్షణ ,నిజాయితీ ,నిబద్దత ,అంకితభావం , నిరాడంబరత
ఇలా ఒక్కటేమిటి ప్రతి తెలుగు పదంలోనూ ఆయనే కనిపిస్తారు

ఒక చిన్న మాట .... 8

జీవితం చాలా చిన్నది ,విలువైనది . ఇంత చిన్న జీవితంలో ఒకరిపై ఒకరం రాగ ద్వేషాలను పెంచుకుంటూ , ఎవరో మనల్ని ఒక మాట అన్నారని , ఎవరో ఏదో చేసారని వారి చర్యలకు ఫలితంగా మనం ఏదో ఒకటి చెయ్యాలని యుగోయిజంగా ఆలోచించటం ఎంతవరకు కరెక్ట్ చెప్పండి . అందరూ ఒకేలా ఉంటారని నేను చెప్పటం లేదు కాని కొంతమంది ఇలానే చేస్తూ ఉంటారు . మనకు ఎందుకులే అంటూ ఇంటువంటి విషయాలు పట్టించుకోలేని వారు కొందరైతే , ప్రతీ కార చర్య కోసం ఎదురుచూస్తూ ,సమయం దొరికినప్పుడల్లా ఎదుటివారి గురించే ఆలోచిస్తూ ,సమయాన్ని వారికే తెలియకుండా వృధా చేసుకునే వాళ్ళు కొందరు . మనిషి నచ్చితే పిచ్చిగా ప్రేమను , అభిమానాన్ని పెంచుకోవటం ,అదే నచ్చకపోతే వాళ్ళు మంచి పనులు చేస్తున్నా వీరి మనస్సు వారిని అంగీకరించక వారిలో వారే ఒక సంఘర్షణకు గురికావటం ,అవసరమా ఇవన్నీ మనకు . 

చిన్నప్పటినుంచి చదువుతూ ,చూస్తూనే ఉన్నాము మనకు అపకారం చేసిన వారికి ఉపకారమే చెయ్యాలి 
మనిషి మంచోడు కాకపోవచ్చు ,వారి మనస్సుని చదవండి ,పుట్టుకతో ఎవరూ మనకు మిత్రులుగా ,శత్రువులుగా జన్మించలేదు . ఈ జీవితమనే కాలంలో ఎంతోమంది ఉన్నారు మీకు నచ్చని లేక నచ్చిన వారే కాదు . ఏదో ఒక విషయంలో వారిలో మీరు మెచ్చేది ఉంటుంది . మంచిని ఆహ్వానించాలి . చెడుని అక్కడికక్కడే మనం మర్చిపోవాలి అది కొంచెం కష్టమే కాని మీ అందమైన మనస్సుకు మరలా మరలా సర్దిచెప్పుకుంటూ ఉంటుంటే మీరు చేసించే తప్పు అనిపిస్తుంది . మీకు ఎవరైతే నచ్చట్లేదో వారే కరెక్ట్ అనిపిస్తుంది . ఎవరో తెలియని వాళ్ళకు మనవళ్ళ అంతరాయం కల్గింది అంటేనే స్పందించి సారీ అని అసంకల్పితంగా చెప్పేస్తాం . మరి మనతోటి జీవించే వాళ్ళకు , మన ఆత్మీయులు అనుకున్న వాళ్ళకు ,మీకు మద్యలో ఏదైనా చిన్న పొడపొచ్చాలు వస్తే మాత్రం చిన్న సారీ తో మీ మద్య ఉన్న దూరాన్ని తగ్గించుకునే ప్రయత్నం చేస్తే తప్పేముంది . 

ఈర్ష్యా ,ద్వేషాలు , కోపాలు ,అలకలు ,ప్రతీ కారాలు ,యుగోలు ఇవన్నీ మనకు మనం సృష్టించుకున్నవే వాటితో పాటు ప్రేమ ,ఆప్యాయతలు కూడా సృష్టించుకున్నవే . మరి మన ఈ అందమైన ,అశాశ్వతమైన జీవితంలో అనవసరమైన వైరాలు ,కారాలు ,మిరియాలు ఎందుకు ? మన మంచితనంతో మరొకరిలో మార్పుకు మనమే ప్రయత్నిద్దాం లేదా మనమే వారికోసం మారదాం ..... 

ఒక చిన్న మాట :  11

నిన్న రాత్రి ఫేస్ బుక్ లో ఆత్మీయ నేస్తాలతో కాసేపు అత్మీయపలకరింపులు
అత్మీయతను అందించి ఆనందాన్ని పంచాయి
అప్పుడప్పుడు ఇలా అత్మీయంగా మాట్లాడుకుంటే ఆ జోష్ నే వేరు
పలకరింపులకే కాదు ఈ స్నేహాలు ,చేతలలో కూడా అవసరమైనప్పుడు మనకు సలహాలు ,సూచనలు ఇచ్చేవారు కొందరైతె , ఎదైనా సహాయం కోరగానే ,వారి వారి సమయం వృధా అని భావించక ,మనకెందుకులే అని వదలక మనకు సహాయం చేసేవారు మరికొందరు . ఒక్కొక్కసారి వారి సాన్నిహిత్యం మన కుటుంబసభ్యులులా తలపిస్తుంది కూడా
ధన్యవాదాలు నా  ముఖ పుస్తక మిత్రులకు , ఆత్మీయులకు ......